Duke folur në shtetin e tij Konektikatit, senatori Dod tha se e mori këtë vendim para 2 javësh, madje pranoi se ishte, siç u shpreh ai, një prej vendimeve më të vështira në karierën e tij politike.
Ai citoi vdekjen e së motrës si dhe të mikut të tij të ngushtë, senatorit Ted Kenedi, si dhe betejën e tij personale me kancerin në prostatë, të gjitha vitin që kaloi, si arsye që çuan në vendimin e tij për të mos rikandiduar.
Senatori Dod, i cili shërbeu edhe në Dhomën e Përfaqësuesve në vitet 70-të dhe në fillim të viteve 80-të, ka luajtur një rol kyç në përgjigjen e Shteteve të Bashkuara për krizën financiare, por anketat e fundit tregojnë se popullariteti i tij ka rënë ndjeshëm.
Mbrëmë edhe senatori tjetër demokrat Bajron Dorgan i Dakotës së Veriut, tha se nuk do të kandidojë për një mandat të ri.
Vendimet e dy senatorëve mund të kenë ndikim të rëndësishëm tek balanca e pushtetit në Washington. Aktualisht në senatin amerikan ka 58 demokratë dhe dy të pavarur, të cilët zakonisht votojnë me demokratët, duke u dhënë atyre shumicën, prej 60 vendesh në organin ligjvënës.//kk//