Zyrtarët kinezë thonë se numri i të vdekurve në rajonin autonom Xinjiang ka arritur në 140 vetë. Përleshjet po zhvillohen mes popullsisë ujgure dhe policisë.
Zyrtarët akuzuan Kongresin Botëror të Ujgurëve për nxitjen e trazirave, ku që nga dita e djeshme, veç të vrarëve, ka patur edhe 800 të plagosur. Ky grup udhëhiqet nga Rabija Kadir, një biznesmene ujgure, e cila është burgosur për disa vjet nga autoritetet kineze dhe që tani jeton në SHBA.
Grupe në mërgim mohojnë përfshirjen
në trazira. Ata thonë se protestat shpërthyen për shkak të shqetësimit
të ujgurëve nga kontrolli i tepëruar i autoriteteve kineze ndaj
mundësive ekonomike, kulturës dhe fesë së tyre. Ujgurët janë kryesisht
myslimanë. Sekretari i Përgjithshëm i OKB-së Ban Ki Moon tha sot se
Kina duhet t'i zgjidhë në mënyrë paqësore dhe përmes dialogut të gjitha
mosmarrëveshjet. Ai i bëri thirrje qeverisë kineze të mbrojë jetën dhe
sigurinë e qytetarëve të vet.//rd//