Më 19 dhjetor tre shtetas gjermanë u arrestuan nën dyshimin se janë të përfshirë në këtë incident, i cili u dënua ashpër nga institucionet vendase e ndërkombëtare. Shërbimi gjerman i zbulimit BND ka konfirmuar se të tre personat janë agjentë të tij, por ka hedhur poshtë çdo mundësi për përfshirjen e tyre në këtë incident.
Gjykatësi ndërkombëtar Vinod Bolello deklaroi se nuk janë gjetur dëshmi të mjaftueshme për të ngritur ndonjë akuzë të qëndrueshme ndaj tre shtetasve gjermanë, arrestimi i të cilëve nxiti vëmendje të madhe të mjeteve të informimit në Kosovë dhe në Gjermani.
Shpërthimi i 14 nëntorit ndodhi në një periudhë të kundërshtimeve të ashpra të Prishtinës zyrtare ndaj një marrëveshjeje gjashtë pikëshe të arritur ndërmjet Kombeve të Bashkuara dhe Serbisë për vendosjen e EULEX-it në Kosovë. Këshilli i Sigurimit i Kombeve të Bashkuara mori parasysh raportin e Sekretarit të Përgjithshëm Ban Ki Moon, ku përfshihen qëndrimet e Beogradit dhe Prishtinës dhe duke nënvizuar se mirëpret qëllimet e tyre për të bashkëpunuar me bashkësinë ndërkombëtare.
Raporti përfshin marrëveshjen gjashtë pikëshe që parasheh një shkallë të lartë autonomie për policinë, drejtësinë dhe doganat në veriun e Kosovës të banuar me shumicë serbe. Ndërsa në një aneks të veçantë është përfshirë edhe një dokument i Prishtinës e cila ngul këmbë se EULEX-i, mund të shtrihet në tërë Kosovën në pajtim me Kushtetutën e saj dhe të zbatojë planin e zotit Martti Ahtisaari.
Beogradi e ka mirëpritur rrjedhën e takimit të Këshillit të Sigurimit, ndërsa autoritetet në Prishtinë kanë këmbëngulur se plani gjashtë pikësh është i papranueshëm dhe cënimi i sovranitetit të Kosovës nuk do të lejohet në asnjë rrethanë. //ad//