Për 92 vite, personazhe të njohur kanë marrë pjesë në Paradën e Krishtlindjes në Hollivud. Siç njofton korrespondentja e Zërit të Amerikës Genia Dulot, këtë vit, parada përfshiu grupin ‘Divas and Drummers of Compton’, një organizatë jo fitimprurëse që punon për të krijuar mundësi për fëmijët nga familje të varfra, që të mësojnë artet skenike.
Shumica e anëtarëve të grupit vijnë nga periferia e Los Anxhelosit që ka një histori të trazuar me dhunën e bandave. Kelli Berry themeloi grupin për të ndihmuar në ndryshimin e këtij reputacioni.
“Shpesh fëmijët me ngjyrë etiketohen gabimisht se janë agresivë, të këqij ose të djallëzuar. Ne duam t'i tregojmë botës se jemi të talentuar dhe se gjërat e mira vijnë edhe nga zonat e periferike të qytetit. Këto vajza punojnë shumë. Valltaret dhe bateristët tanë janë studentë të zellshëm. Ata kanë tipare të udhëheqësve në shtëpi e tyre, shkolla e komunitetet ku jetojnë. Ne erdhëm në Paradën e Krishtlindjes në Hollivud për t'i treguar botës aftësitë dhe talentet tona”, thotë znj. Berry.
Grupi mëson stile të ndryshme kërcimi, nga baleti tek hip hop-i. Zonja Berry dhe bashkëshorti i saj Terence formuan grupin në vitin 2012 ndërsa rrisnin fëmijët e tyre në qytetin Kompton.
“Qëllimi ynë është të krijojmë një mjedis të sigurt në mënyrë që ata të mësojnë se si të kenë marrëdhënie pozitive e të ndërveprojnë me të rinj të tjerë apo si të kuptojnë rëndësinë e integritetit dhe të qenit një person i mirë”, thotë zoti Berry.
Në vitin 2018 grupit të vallëtareve iu shtua një trup bateristësh i përbërë nga djem të rinj. Jahsyr Faulkner është prej themelimit anëtar i grupit.
“Ajo që ne bëjmë tregon se si disa organizata që nisin nga vende kaq të vogla mund të bëjnë gjëra të mëdha. Ne kemi interpretuar në një nga shfaqjet gjatë finales së futbollit amerikan, ‘Super Bowl-it’, apo edhe spektaklit ‘America’s Got Talent’. Ne po rritemi dhe po shënojmë sukses”, thotë ai.
Interpretimi në Hollivud është pjesë e përpjekjeve për rritjen e suksesit pasi parada e Krishtlindjes transmetohet ndërkombëtarisht. Brently Shorts thotë se ky është fillimi i planeve të mëdha për karrierën e saj të kërcimit.
“Është shumë frymëzuese sepse një ditë dua të kem ekipin tim dhe t'i sjell këtu dhe të interpretojnë”, thotë ajo.
Aktori i njohur Jeremy Renner udhëheq paradën e këtij viti.
“Bateristët nga Komptoni po bëhen të njohur. Janë krijuar mundësi për ta. Të gjithë duhet të kenë mundësinë të tregojnë talentin dhe kur kjo ndodh, atëherë hapen mundësi edhe për të tjetë”, thotë zoti Renner.
Programi i edukimit muzikor përqendrohet tek të rinjtë e moshës nga 5 deri në 19 vjeç me qëllim përhapjen e një fryme pozitive e besimi të ndërsjellë, duke argëtuar dhe frymëzuar komunitetin.