Shoqata Amerikane e Psikiatrisë thotë se me afrimin e zgjedhjeve, niveli i stresit tek amerikanët shtohet, pavarësisht nga bindjet e tyre politike. Përcjellja e vazhdueshme e lajmeve, debatet stresuese dhe shqetësimi për të ardhmen e vendit ushtrojnë trysni mbi mirëqenien mendore. Siç njofton korrespodenti i Zërit të Amerikës Maxim Adams disa psikologë e quajnë një dukuri të tillë ‘stres zgjedhor’.
Zgjedhjet presidenciale të 5 nëntorit po shkaktojnë ankth për gati tre të katërtat e të anketuarve në një sondazh të Shoqatës Amerikane të Psikiatrisë. Disa psikologë po e quajnë këtë dukuri si çrregullim i stresit “për shkak të zgjedhjeve”.
“Klima politike, diskutimet mbi zgjedhjet, janë bërë shumë më të forta dhe shumë më përçarëse. Dhe ne ngritëm pikëpyetjen nëse një gjë e tillë kishte ndikim tek individët. Dhe sigurisht, nga përgjigjet rezultoi se të gjitha këto kanë qenë burim stresi për shumë individë. Anktetime të tjera kanë patur rezultate të ngjashme”, shprehet Lynn Bufka nga Shoqata Amerikane e Psikologjisë.
Stresi politik ndikon shumë aspekte të jetës, thotë profesori i shkencave politike Kevin Smith.
“Një e pesta ose një e katërta e amerikanëve raportojnë ndërprerje të marrëdhënieve shoqërore dhe madje edhe probleme në punë për shkak të politikës”, shprehet ai.
Studimi i zotit Smith tregon se të rinjtë si dhe ata me pikëpamje të majta dhe ata që janë më të përfshirë në politikë janë më të prirur ndaj stresit zgjedhor.
“Sigurisht, ne e dimë se si mund të kufizojmë ndikimin tek shëndeti, duke mos i dhënë rëndësi politikës. Problemi është se kjo mund të jetë e diçka e mirë për shëndetin e individit, por nuk është veçanërisht e mirë për shëndetin e një shoqërie”, thotë profesori Smith.
Një ekspert për menaxhimin e stresit, Dr Kiran Dintyala, i njohur si doktor “Qetësia”, ka botuar së fundmi librin ‘Mantra për politikë të paqtë’ ku ai ndan disa këshilla se si të shmanget stresi i tepërt në periudhën para zgjedhjeve.
“ Zgjedhjet vijnë e ikin. Politikanët vijnë e ikin. Mund të ndryshojnë të ardhmen e njerëzve ndoshta 10, 20 apo 30 për qind, por pjesa më e madhe e të ardhmes së tyre, lumturia e tyre varet nga ajo që ata bëjnë çdo ditë, nga sjellja dhe ndjenjat e tyre”, shprehet doktor Kiran Dintyala.
Por zonja Bufka thotë se ka një rrugëdalje nga dëmi psikologjik. Dhe kjo varet nga aftësia e individit për të kontrolluar burimin e tij të informacionit dhe nga shmangia e ndjekjes së pandërprerë të lajmeve politike ne celular.
“Ekspozimi i vazhdueshëm ndaj informacioneve negative, pamjeve dhe retorikës negative do të çojë në rritje të ndjenjës së negativitetit dhe stresit. Ndaj mund ta kontrollojmë një gjë të tillë. Një tjetër gjë për të cilën i nxisim njerëzit është të përfshihen në aktivitete domethënëse, pavarësisht nëse kanë të bëjnë me zgjedhjet ose me çështjet apo problemet aktuale shoqërore që kanë rëndësi për ta”, thotë ajo.
Shoqata Amerikane e Psikiatrisë thotë se është shumë e rëndësishme ruajtja e qetësisë dhe mbajtja e marrëdhënieve shoqërore, si edhe qëndrimi me njerëzit e dashur, një stil jete aktiv, ushqim dhe gjumi i shëndetshëm. Të gjitha këto mund të kufizojnë ankthin në ditët përpara zgjedhjeve.