Gjykata e Lartë e Shteteve të Bashkuara hodhi poshtë një vendim të vitit 1984 që i jepte të drejtë agjencive federale të interpretonin ligjet që ato administrojnë. Kjo vlerësohet si humbje për administratën e Presidentit Joe Biden.
Gjashtë anëtarë të kësaj gjykate votuan pro dhe tre kundër duke miratuar kërkesën e kompanive të peshkimit që sfiduan një program qeveritar, të financuar pjesërisht nga industria, që vëzhgonte mbipeshkimin e një lloji të peshkut në brigjet e Nju Ingland.
Vendimi që u pëmbys nga gjykata ka të bëjë me një rast që përfshinte kompaninë e naftës ‘Chevron’. Ky vendim u kishte bërë thirrje gjyqtarëve të mbështeteshin tek interpretimet që iu bënin agjencitë federale ligjeve amerikane që vlerësoheshin si të paqarta. Kjo doktrinë ka kohë që kundërshtohet nga konservatorët dhe interesat e biznesit.
Ndarja e thellë që ekziston momentalisht në Kongres ka ndikuar në rënien e produktivitetit të legjislativit. Kjo ka bërë që veçanërisht presidentët demokrat të mbështesin rregullat e nxjerra nga agjencitë federale amerikane në mungesë të ligjeve.
Administrata e presidentit demokrat Joe Biden kishte mbrojtur rregulloren e Shërbimit Kombëtar të Peshkimit Detar dhe doktrinën që mbështetej në vendimin e vitit 1984. Programi i ruajtjes së peshkut megjithatë filloi në vitin 2020 nën administratën e ish-presidentit republikan Donald Trump.
Rregullorja kërkonte që disa peshkatarët të mbanin në anijet e tyre kontraktorë të qeverisë amerikane dhe të paguanin për shërbimet e tyre në det ndërsa monitoronin kapjen.
Kompanitë që bën ankesën, të udhëhequra nga ‘Loper Bright Enterprises’ me bazë në Nju Xhersi dhe kompania me bazë në Roud Ajlend, ‘Relentless Inc’, në vitin 2020 paditën shërbimin e peshkimit, duke thënë se programi i monitorimit tejkaloi autoritetin e agjencisë së Departamentit të Tregtisë.
Ankesa nga peshkatarët u mbështet nga grupe të ndryshme interesi konservatore, duke përfshirë rrjetin e bizneseve të miliarderit Charles Koch. Procesi gjyqësor është pjesë e asaj që është quajtur “lufta kundër shtetit administrativ”, një përpjekje për të dobësuar burokracinë e agjencisë federale që interpreton ligjet, harton rregulla federale dhe zbaton veprime ekzekutive.
Gjykata e Lartë, ku gjashtë nga nëntë gjyqtarët e saj janë konservator, ka sinjalizuar skepticizëm ndaj fuqisë rregullatore të agjencive federale. Gjatë viteve të fundit Gjykata Supreme ka nxjerrë vendime për të frenuar atë që gjykatësit e saj konservatorë e kanë parë si tejkalim të pushtetit nga Agjencia për Mbrojtjen e Mjedisit dhe agjenci të tjera.
Programi i ruajtjes së peshkut synonte të monitoronte 50 për qind të lundrimeve të deklaruara për peshkimin e një lloji të peshku.
Kostot e programit ishin parashikuar të ndaheshin midis qeverisë federale dhe industrisë së peshkimit. Peshkatarët komercialë do të duhej të paguanin 710 dollarë në ditë, për 19 lundrime në vit. Kjo mund të reduktonte të ardhurat deri në 20 % për anije, sipas shifrave të qeverisë.
Administrata e Presidentit Biden tha se programi ishte autorizuar sipas një ligji federal të vitit 1976 i quajtur ligji ‘Magnuson-Stevens’ për të ndaluar peshkimin e tepërt në ujërat bregdetare të Shteteve të Bashkuara. Administrata tha në dokumentet që ishin dorëzuar në gjykatë se programi ishte pezulluar në prill të vitit 2023 për shkak të financimit të pamjaftueshëm federal.
Gjykata e Apelit në Uashington dhe Gjykata e Apelit në Boston, të dyja vendosën në favor të qeverisë.
Gjykata e Lartë ka nxjerrë më parë edhe vendime të tjera që përfshijnë fushëveprimin e agjencisë, duke përfshirë dy vendime të enjten. Gjykata hodhi poshtë zbatimin e brendshëm të ligjeve të Komisionit të Letrave me Vlerë që mbrojnë investitorët kundër mashtrimit të letrave me vlerë. Ajo gjithashtu bllokoi një rregullore të Agjencisë për Mbrojtjen e Mjedisit që synonte reduktimin e emetimeve të ozonit që mund të përkeqësojnë ndotjen e ajrit në shtetet fqinje.
