Jos Ubels ka një fermë lopësh në rrafshinën veriore të Holandës. Tufës së tij me mbi 300 kokë, i është shtuar një viç i ri. Fermeri thotë se rregullat e reja të Bashkimit Evropian po e rrezikojë jetën e viçit të porsalindur.
Ndërsa Evropa kërkon të zbusë kërcënimet e ndryshme që paraqesin ndryshimet klimatike, blloku po vë në zbatim më shumë rregulla për fermerët.
Fermerëve u kushton një ditë-pune në javë burokracia evropiane, duke iu përgjigjur kërkesave të bllokut dhe zyrtarëve të shtetit, që kanë vendosur rregulla se kur fermerët mund të mbjellin dhe korrin, dhe sa pleh organik, apo kimik mund të përdorin.
Problem tjetër për fermerët është konkurrenca nga importet e lira, që ulin çmimet e prodhimeve të tyre, pa qenë nevoja që importet të përmbushin të njëjtat standarde. Për dekada me radhë partitë politike kryesore dështuan t’i trajtonin ankesat e fermerëve, thotë Ubels. E djathta radikale po e shfrytëzon këtë situatë.
Në pjesën më të madhe të bllokut me 27 anëtarë, nga Finlanda në Greqi, Poloni dhe Irlandë, pakënaqësia e fermerëve vazhdon të rritet ndërsa afrojnë zgjedhjet parlamentare të Bashkimit Evropian në muajin qershor. Zoti Ubels është i dyti në komandën e Forcës së Mbrojtjes së Fermerëve (FDF), një nga grupet më të zëshme që doli nga protestat e fermerëve.
FDF, simboli i së cilës janë dy sfurqe të kryqëzuara, u formua në vitin 2019 dhe që nga ajo kohë është zgjeruar edhe në Belgjikë dhe ka lidhje edhe me grupe të ngjashme në Bashkimin Evropian.
Ky grup është një forcë nxitëse e një demonstrate të planifikuar të zhvillohet më 4 qershor në Bruksel, e cila shpreson të grumbullojë 100,000 protestues në kryeqytetin e bllokut dhe të ndikojë në përcaktimin e rezultatit të zgjedhjeve.
“Është koha të reagojmë”, thotë fermeri Ubels. Fermerët, thotë ai, nuk do t’i dëgjojnë më me qetësi zyrtarët dhe nuk do të bëjnë ato që u thuhen. Ai shton se nuk ka humbur besimin te demokracia, por tek politika. Slogani i organizatës FDF në faqen e saj në internet është edhe më ogurzi, “Besimi ynë në sundimin e ligjit është lëkundur”.
Gjatë një proteste pranë selisë së Bashkimit Evropian në Belgjikë në muajin mars, fermerët i vunë zjarrin një stacioni metroje dhe sulmuan policinë me vezë dhe jashtëqitje të bagëtive. Protestuesit në Francë u përpoqën të sulmonin një ndërtesë qeveritare.
Në një video nga një protestë tjetër, ku digjeshin goma dhe sende të tjera, kreu i organizatës FDF, Mark van den Oever tha se politikanët së shpejti do të jenë në qendër të vëmendjes. Organizata i hedh poshtë akuzat se fjalimi përbënte kërcënim për dhunë fizike.
Gjatë muajve të dimrit, kolona me traktorë dhe makina bujqësore bllokuan për ditë me radhë porte dhe autostrada kryesore në mbarë Bashkimin Evropian, ndër protestat më të mëdha të fermerëve në një gjysmë shekulli.
Fermerët dhe Bashkimi Evropian nuk kanë qenë gjithmonë në të njëjtën linjë, por ajo që po ndodh tani është animi drejt ekstremit të djathtë.
Pavarësisht rëndësisë strategjike që ka bujqësia, BE-ja e pranon se fermerët kanë të ardhura 40% më të pakta se punonjësit e sektorëve të tjerë, ndërsa 80% e mbështetjes shkon për 20% të fermerëve të privilegjuar. Shumë prej 8.7 milionë punonjësve të sektorit të bujqësisë janë pranë, ose nën kufirin e varfërisë.
Bashkimi Evropian po përpiqet të miratojë ligje të rrepta që prekin bujqësinë si pjesë e planit për të luftuar ngrohjen globale me synimin për ta bërë bllokun neutral ndaj klimës deri në vitin 2050.
Bujqësia në Bashkimin Evropian është shkaktare e rreth 10% të emetimeve të gazeve që shkaktojnë efektin serrë nga burime të tilla si plehrat kimike, lënda djegëse e automjeteve dhe gazi i metanit që çlirohet nga bagëtitë.
