Policia e Kosovës tha se një grua 35 vjeçare është vrarë të mërkurën në mbrëmje në oborrin e Qendrës Klinike Universitare në Prishtinë.
Policia tha se bashkë me prokurorinë po kryejnë hetime për të ndriçuar rrethanet dhe motive e mundshme të vrasjes dhe nuk tha nëse ka të arrestuar lidhur me rastin.
Mediet lokale thanë se gruaja është qëlluar dhe vrarë me armë zjarri nga ish burri i saj.
Vrasja e së mërkurës nxiti reagime në shkallë të gjerë.
“Sonte vajton një Kosovë e tërë për gruan që s’arriti të bëhet nënë, për bijën e humbur, për jetën që u shua pa të drejtë. Sonte vajtojmë për jetën e palindur që nuk frymoi kurrë, për jetën që nuk erdhi në jetë”, shkroi në rrjetet sociale, presidentja e Kosovës, Vjosa Osmani, duke thekuar se rastet e tilla janë sprovë jo vetëm për shtetin por edhe shoqërinë.
“Përgjigja për dhunuesit, abuzuesit dhe vrasësit është rendi dhe ligji e dënimi maksimal. Borxhi ynë ndaj viktimave të dhunës, jetëve të palindura e jetëve të ndërprera pa të drejtë është një dhe i vetëm: DREJTËSI!”, shkroi ajo.
Të papranueshme dhe të padurueshme, e cilësoi këtë vrasje kryeministri i Kosovës Albin Kurti.
Vrasja u dënua me fjalët më të ashpra edhe nga udhëheqës partish politike, ndërsa Rrjeti i Grupeve të Grave paralajmëroi protesta për të enjten në Prishtinë.
Kjo është vrasja e dytë e grave në një javë në Kosovë. Më 25 nëntor një burrë vrau gruan e tij në Prishtinë.
Të dyja vrasjet ndodhën ndërsa në Kosovë po mbahet një fushatë 16 ditëshe kundër dhunës ndaj gruas me moton “as edhe një më shumë”.
Policia e Kosovës tha se nga janari i këtij viti e deri në muajin tetor, janë shënuar dy mijë e 273 raste të dhunës në familje.