BIRMINGHAM, Alabama - Dy veteranë amerikanë të luftës nga shteti i Alabamës, të cilët ishin në Ukrainë për të ndihmuar në luftën kundër Rusisë, nuk kanë kontaktuar me të afërmit e tyre prej disa ditësh dhe janë zhdukur, thanë të mërkurën ndihmës të ligjvenësve të këtij shteti.
Të afërmit e Andy Tai Ngoc Huynh, 27 vjeç, nga Trinity dhe Alexander Drueke, 39 vjeç nga Tuscaloosa, kanë qenë në kontakt me zyrat e ligjvenësve të Albamës në Kongresin amerikan, për të kërkuar ndihmë për ndonjë informacion rreth vendndodhjes së tyre, thanë zyrtarët e shtypit.
Ligjvënësi Robert Aderholt tha se veterani Huynh kishte dalë vullnetar për të luftuar me ushtrinë ukrainase kundër Rusisë, por të afërmit nuk kanë dëgjuar prej tij që nga 8 qershori, kur ai ishte në rajonin e Kharkivit, në verilindje të Ukrainës, pranë kufirit rus. Veteranët Huynh dhe Drueke ishin së bashku, tha një ndihmës i ligjvënësit Aderholt.
"Siç mund ta imagjinoni, të afërmit e tij janë shumë të shqetësuar për të," tha zoti Aderholt në një deklaratë. "Zyra ime ka kërkuar informacion si në Departamentin amerikan të Shtetit ashtu edhe në Byronë Federale të Hetimit".
Ligjvënësja Terri Sewell tha se nëna e veteranit Drueke kontaktoi zyrën e saj në fillim të kësaj jave, pasi humbi kontaktin me të birin.
Departamenti amerikan i Shtetit tha se po shqyrton njoftimet se forca separatiste, të mbështetura nga Rusia në Ukrainë, kishin kapur të paktën dy shtetas amerikanë. Nëse konfirmohet, ata do të jenë amerikanët e parë që luftojnë për Ukrainën që dihet se janë kapur që nga fillimi i luftës më 24 shkurt.
"Ne po ndjekim nga afër situatën dhe jemi në kontakt me autoritetet ukrainase," tha një zëdhënës i Departamentit të Shtetit në një deklaratë për gazetarët. Ai nuk pranoi të bënte komente të mëtejshme, duke përmendur çështjen e privatësisë.
Zëdhënësi i Këshillit të Sigurisë Kombëtare në Shtëpinë e Bardhë, John Kirby tha të mërkurën se administrata nuk ishte në gjendje të konfirmonte njoftimet për amerikanët që figurojnë të humbur.
"Ne do të bëjmë më të mirën e mundur për ta ndjekur situatën dhe për të parë se çfarë mund të mësojmë," tha zoti Kirby.
Megjithatë, ai përsëriti paralajmërimin kundër shkuarjes së amerikanëve në Ukrainë.
"Ukraina nuk është vendi ku amerikanët duhet të udhëtojnë. Nëse keni pasion për të mbështetur Ukrainën, ka disa mënyra për ta bërë këtë, që janë më të sigurta dhe po aq efektive", tha ai.
Një gjykatë në Donetsk, nën kontrollin e forcave separatiste, dënoi me vdekje dy britanikë dhe një maroken javën e kaluar.
Ligjvënësi Adam Kinzinger shkroi në Twitter se amerikanët "janë regjistruar në ushtrinë ukrainase, kështu që kanë mbrojtje ligjore luftarake. Si të tillë, ne presim që ata të trajtohen në përputhje me konventën e Gjenevës", tha ai. Është e paqartë nëse zoti Kinzinger, një republikan nga Illinoi, ka ndonjë informacion të mëtejshëm për dy veteranët.
Ai po komentonte ndaj një postimi në Twitter të lëshuar më herët të mërkurën nga një grup ish-ushtarakësh amerikanë dhe francezë, ku thuhej se dy amerikanë që luftonin me ta, u kapën një javë më parë. Grupi tha se inteligjenca ukrainase e konfirmoi informacionin.
Në fillim të luftës, Ukraina krijoi Legjionin Ndërkombëtar për shtetasit e huaj, që donin të ndihmonin kundër agresionit rus.