Një 18-vjeçar i bardhë i armatosur qëlloi për vdekje 10 persona dhe plagosi tre të shtunën në një supermarket në një lagje me banorë të shumtë afrikano-amerikanë në pjesën veriore të shtetit të Nju Jorkut, përpara se të dorëzohej pas atij që autoritetet e quajtën një akt të "ekstremizmit të dhunshëm të motivuar nga racizmi”.
Autoritetet thanë se i dyshuari, i cili kishte një armë zjarri dhe dukej se kishte vepruar i vetëm, u nis me makinë në Buffalo nga shtëpia e tij disa orë larg për të bërë sulmin që ai e transmetoi në kohë reale në platformën e mediave sociale Twitch
Njëmbëdhjetë nga 13 personat e goditur me armë zjarri ishin afrikano-amerikanë, thanë zyrtarët. Dy të tjerët ishin të bardhë. Nuk është e qartë përkatësia racore e të vdekurve.
Sipas dokumenteve gjyqësore, i dyshuari quhet Payton Gendron nga Conklin, një qytet me rreth 5000 banorë në shtetin e Nju Jorkut pranë kufirit me Pensilvaninë.
Disa orë pas sulmit mbi të u ngritën akuza për vrasje të shkallës së parë, të cilat parashikojnë një dënim maksimal me burgim të përjetshëm pa lirim me kusht. Nju Jorku nuk ka dënim me vdekje.
