Raporti i hartuar nga një kompani për sigurinë kibernetike me qendër në Florida, tregon se rezultati i Distriktit Maricopa në nëntor ishte i saktë, thanë autoritetet e këtij distrikti
Distrikti më i populluar i Arizonës ka konfirmuar se një projekt-raport i një rishikimi nga ana e republikanëve të numërimit të votave për zgjedhjet presidenciale të vitit 2020 rikonfirmon Presidentin Joe Biden si fitues.
Raporti i hartuar nga "Cyber Ninjas", një kompani pak e njohur për sigurinë kibernetike me qendër në Florida, tregon se rezultati i Distriktit Maricopa në nëntor ishte i saktë, thanë autoritetet e këtij distrikti në Twitter të enjten vonë.
Përfundimi, i cili pritet të dalë zyrtarisht të premten, i jep fund efektivisht përpjekjes së diskredituar të udhëhequr nga republikanët për të përmbysur fitoren e zotit Biden atje, në favor të ish-presidentit Donald Trump.
Fitorja e zotit Biden në distriktin kryesor të Arizonës ishte e para nga një kandidat presidencial demokrat prej dekadash.
Përkrahësit dhe organizatat e zotit Trump, që pretendojnë se atij iu vodhën zgjedhjet, përfshirë disa që kanë përhapur teori konspiracioni, financuan rishikimin e numërimit me vlerë prej miliona dollarësh.
Që nga humbja e tij zgjedhore, ish-presidenti Trump është shfaqur përsëri për të kritikuar pasardhësin e tij.
Në korrik, në tubimin e tij të parë me stil fushate që kur u largua nga Shtëpia e Bardhë, ai përsëriti gënjeshtrën se kishte fituar në zgjedhjet e nëntorit dhe se presidenti Biden u shpall fitues vetëm përmes manipulimit.
Zoti Trump mund të kërkojë rizgjedhje në vitin 2024, por nuk i ka njoftuar planet e tij.
