Miliona njerëz janë zhvendosur në Nju Jork në kërkim të një jete më të mirë dhe qyteti ka dokumentuar me kujdes të dhëna për shumë prej tyre. Një zyrë e veçantë e qytetit të Nju Jorkut që merret me arkivën ka ruajtur të dhëna të shumta që nga filmimet apo fotografitë e deri tek pasaportat e skanuara e madje edhe shkëmbimet me letra të kryebashkiakëve me njerëz të famshëm. Korrespondetja e Zërit të Amerikës Anna Nelson sjell më shumë hollësi nga qyteti i Nju Jorkut.
Miliona njerëz tërhiqen nga stili i jetesës në Nju Jork, pamjet mahnitëse dhe mundësitë që ofron ky vend unik. Një zyrë e posaçme e bashkisë dokumenton të dhëna të shumta për njerëz të rrallë dhe zhvillime interesante.
Brenda një kasaforte të vjetër dhe gjigande ruhen fillimet e qytetit të Nju Jorkut, çertifikatat e para të shtetësisë për njerëz të të gjitha gjinive, kombësive dhe racave. Michael Lorenzini është punonjës i bashkisë që merret me arkivën dhe median.
“Një numër hebrenjsh u refuzuan dhe ju tha që të bënin peticion nëse kjo nuk u dukej e drejtë. Faktikisht ata bënë peticionin dhe u kthyen deri në Amsterdam. Drejtorët e kompanisë “Dutch West India” këmbëngulën që atyre tu jepet shtetësia”, thotë zoti Lorenzini.
Arkiva e bashkisë u krijua rreth 40 vjet më parë, por ka provuar të jetë tejet e veçantë dhe rrallë gjen një arkivë të tillë në qytetet amerikane.
Në dhomën e errët po dixhitalizohen rreth pesë milionë fotografi të shkrepura para se të egzistonin hartat e kompanisë Google. Departamenti i financave të bashkisë fotografoi çdo ndërtesë të qytetit që paguante taksa.
Këtu gjen foto të lagjeve, ish-kryebashkiakut të ndierë Ed Koch në metro e madje edhe pamje të brendshme të apartamentit të artistit Andy Warhol. Po ashtu edhe një koleksion gjigand të skenave të krimit. Fotografi Matt Minor merret me arkivën e bashkisë.
“Gjëja më e çuditshme që kam fotografuar është një valixhe që ishte pjesë e një gjyqi të një vrasje mafioze në vitet 1920-të. Brenda saj ende gjenden njolla gjaku nga vrasja”, thotë zoti Minor.
Por për Kenneth Cobb, miliona dosje penale nuk janë thjesht dokumente por ngjarje familjare, tragjedi, dramë dhe pjesë e historisë.
“Mosses Rossen u dënua sepse kishte dy gra. Të gjithë pjesëmarrësit e kësaj ndodhie ishin rusë”, thotë Kenneth Cobb me arkivën e qytetit të Nju Jorkut.
Shkëmbime letrash mes kryebashkiakësh, çertifikata lindje, raste të lidhura me kërkimin e njerëzve të humbur pas 11 shtatorit, madje këtu gjen edhe dosje misterioze. Arkivat nga departamenti i shëndetit të rreth 160 viteve më parë tregojnë mbi transportimin e kufomave gjatë Luftës Civile për të mënjanuar përhapjen e sëmundjeve në qytet.
Një arkivë mjaft e pasur që mund të tregojë më shumë për qytetin e Nju Jorkut se sa askush tjetër thotë arkivisti Kenneth Cobb:
“24 prill 1865. Emri i të ndjerit është Abraham Lincoln i moshës 56 vjeçare. Vendi i vdekjes Uashington. Kolona thotë nga sëmundje por në të vërtetë ai u qëllua me revole. Nuk kishte rëndësi se kush ishte personi; kjo praktikë regjistrimi ndiqej për të gjithë”.
Zyra e arkivës në qytetin e Nju Jorkut është e hapur për publikun. Kushdo mund të vizitojë për të parë ndyshimet që ka kaluar qyteti ndër shekuj, thotë zoti Cobb:
“Njeriu mbetet njeri. Gjërat nuk kanë ndryshuar.”
Facebook Forum