Autoritetet ruse ndalojnë qindra aktivistë të tjerë

Policia ruse ka ndaluar qindra njerëz të shtunën, përfshirë aktivistë të njohur të opozitës, të mbledhur për protesta në Moskë.

Demonstruesit mbushën rrugët e kryeqytetit rus me thirrjet për të lejuar regjistrimin e kandidatëve të opozitës në zgjedhjet lokale për bashkinë e Moskës.

Udhëheqësi i opozitës, Aleksei Navalni kishte bërë thirrje për protesta pranë zyrave të bashkisë së Moskës, për t’u bërë presion autoriteteve të lejojnë regjistrimin e kandidatëve për zgjedhjet e 8 shtatorit.

Agjencia e lajmeve Reuters njofton se dëshmitarët tregojnë që disa nga të arrestuarit duket se ishin kalimtarë të rastit.

Autoritetet e kanë cilësuar protestën si të paligjshme. Ata thonë se kandidatët e opozitës nuk mund të regjistrohen pasi nuk kanë arritur të mbledhin numrin e nevojshëm të firmave. Opozita e ka hedhur poshtë këtë pretendim, duke e quajtur sajesë.