Këshilli i Europës dhe ambasada e Zvicrës, në bashkëpunim me qeverinë e Shqipërisë, paraqitën sot një portal të ri për menaxhimin e burimeve njerëzore të administratës publike.
Portali administrata.al është fryti i projektit dhjetëvjeçar për fuqizimin e qeverisjes vendore, përmirëson transparencën dhe shërbimet nga administrata publike. Portali është një mjet gjithëpërfshirës dhe inovator, i pari i këtij lloji në vendet e Ballkanit Perëndimor.
“Ky portal i administratës publike është një hap i madh drejt një administrate më efektive, transparente, përfshirëse e të aksesueshme, që përmirëson shërbimet dhe besimin e publikut te institucionet demokratike", - tha Juta Gutzkou, përfaqësuese e Këshillit të Europës në Tiranë.
Portali lidh institucionet publike mes tyre dhe thjeshton procedurat, duke riorganizuar nëpunësit nga një burim i vetëm në dobi të qytetarëve.
Ai pritet të standartizojë vendet e punës dhe rekrutimet në shërbimin civil, unfikimin e vlerësimeve për nëpunësit publikë.
Portali administrata.al ka dy funksione; pjesa e jashtme për rritjen e transparencës me publikun dhe pjesa e brendshme për të përmirësuar komunikimin.
Autorët besojnë se portali do të forcojë administratën publike dhe decentralizimin e pushtetit vendor.
Portali është një ndihmë e qëndrueshme drejt një administrate publike profesionale, efektive dhe moderne në Shqipëri.
Reforma e Administratës Publike është një nga 5 kriteret kryesore për hapjen e negociatave të pranimit të Shqipërisë në BE.
Këshilli i Europës dhe Zvicra po e ndihmojnë Shqipërinë qysh nga viti 2009 për të rregulluar ligjet dhe praktikat e kësaj fushe sipas 12 Parimeve të Mirë-Qeverisjes.
Facebook Forum