Këtë muaj mbushen 20 vjet nga konferenca e mbajtur në Rambuje afër Parisit, ku një delegacioni të Jugosllavisë dhe një tjetri që përfaqësonte shqiptarët e Kosovës iu ofrua nga komuniteti ndërkombëtar të nënshkruanin një marrëveshje për paqe, që do t’i jepte fund krizës humanitare në Kosovë.
Në fillim, shqiptarët ngurronin të pranonin një zgjidhje, sipas të cilës Kosova mbetej pjesë e Serbisë. Edhe serbët kundërshtonin. Ata nuk donin rikthimin te statuskuoja e para vitit 1990, siç parashikonte marrëveshja. Përfundimisht, më 18 mars 1999, delegacioni shqiptar, amerikan dhe britanik nënshkruan, ndërsa ai serb dhe rus refuzuan.
Kjo çoi në bombardimin e NATO-s kundër forcave të presidentit jugosllav Sllobodan Millosheviç dhe largimin e tyre nga Kosova. Komuniteti i shqiptarëve të Amerikës luajti një rol me rëndësi në sensibilizimin e administratës amerikane për gjendjen në Kosovë. Kolegu ynë Ilir Ikonomi bisedoi me veprimtarin nga Nju Jorku Harry Bajraktari, i cili gjatë konferencës shkoi në Rambuje për t’u takuar me delegacionin shqiptar.
Harry Bajraktari, biznesmen pronash të patundshme në Nju Jork ruan mjaft kujtime nga Konferenca e Rambujesë. Ai thotë se mes delegacionit shqiptar kishte dilema dhe hezitime dhe frika më e madhe ishte se nënshkrimi i marrëveshjes së Rambujesë mund ta linte Kosovën përfundimisht nën Serbinë.
Zoti Bajraktari thotë se e gjithë lufta e shqiptarëve deri në atë kohë kishte qenë që Kosova të bëhej e pavarur. Me refuzimin e Millosheviçit për të nënshkruar, NATO-ja filloi shumë shpejt bombardimet kundër forcave serbe.
Facebook Forum